يوميـات نتاويــة ... سامح طاحون

بعد طبع الكتاب  بنستعد الان للنشر قريبــا بعد العيد باذن الله  وهيكون موجود باكبر مكتبات القاهرة والاقاليم 

وان شاء الله  الكل مدعو  لحفل توقيع الكتاب  فى اول  يوم للنشر بساقية الصاوى  

سامح طاحون 

تقدرى تجاوبينى ؟؟ سامح طاحون

انهارده  ومع بداية يوم جديد 

الصبح بدرى وانا سامع زقزقة العصافير 

لاقيتنى بدندن  والدندنه  شجن 

حسيت انى عايز اتمرد وابتدى من جديد

حسيت انى متكتف وعايز اطيير

حسيت ان الشاب اللى جوايا اتسجن 

ولاقيت روحى بتبكى من غير دموع 

واكن حجر كاتم على صدرى 

  مش عارف اتنفس 

فى اللحظة دى نزلت دموع 

وقولت ياترى انا ميت دلوقتى ولا ده تاثير جوع 

جبت اكل .. وما اكلتوش 

عرفت انه مش جوع 

قولت يبقى ميت 

استنى فى الملكين 

ساعه واتنين  

وبرضه مجوش 

قولت يبقى صاحى 

طيب يكون ايه السبب بالى حاسس بيه 

وبعد تفكييييير عميق  افتكرت ان امبارح فضلت انضف فى جراحى 

وفضل جرح عفانته زياده 

هو جرحك .............

ايوه هو جرحك ..............

لساه يا كلبة بيوجعنى

وانتى جايالى دلوقتى وبتقوليلى عايزاك تسمعنى ؟

كنتى فين لما شيبت وانا فى عشرينى؟؟

لو قدرتى تجاوبينى ...

وقتها بس ممكن اكوى الجرح اللى بيوجعنى

سامح طاحون 

s.tahuon@live.com

دى دموعك بجد ؟ .... سامح طاحون

دى دموعك بجد؟

ولا سلفاهم من عند الجيران؟

وهل فعلا عمرك ماحبيتى حد؟

وانا اول واحد يدق البيبان؟

طب ليه فتحتيلى باب قلبك؟

مادام بتخافى من الحب وال ايه قلبك غلبان!

طب ازاى عرفتى انى بحبك؟

وليه دايما الاقيكى فى السرحان؟

واوقات كتير بيظهر غبائك..

لما اسئلك عن احساسك..

تقول بردانه وامتى الصيف يدق البيبان..

هو كله كده دق؟

دق قلبى ودق الصيف...

وبعدها هيكون دق ناقوس النسيان...

وترجعى تانى تقابلى حد

وتوصفيله اد ايه قلبك غلبان ..

سامح طاحون
s.tahuon@live.com

معقول كـده ؟؟ .... سامح طاحون

معقول كده ؟؟

فى جنان بالشكل ده؟؟

اما انت غريب بجد ...

وزعلان على نفسك وبتقول مخنوق ؟

ده اقل واجب يا ابو الشوق ..

بطل هبل وانت تفوق ..

اعمل لنفسك ابديت وخلى ويندوزك يروق ..

هتلاقى حياتك بقت لذيذه وعيش زى اى مخلوق ..

ليه دايما عايش فى دنيا لوحدك ؟

ليه دايما منضف قلبك ..

ليه دايما بتخاف على الناس ؟..

خليك زيهم

حب نص نص

وصاحب نص نص ..

واتأثر نص نص ..

ولو ضميرك صحى قوله اخرس هسسس..

هتلاقيك ارتاحت ..

وهتنسى انك فى يوم انجرحت ..

سامح طاحون
s.tahuon@live.com

من الخنقه هطق .... سامح طاحون

حاسس بخنقه وهم

والحياة شعارها مرفوع فى العلالى بيهفهف

شعارها كله غم

مكتوم وكتمتى ذاتها بتعانى

مظلوم وفاقد الهوية 

وتايه فى الدنيا بين المعانى

ممكن اتكلم واصرخ

علشان افوق

بس الحيرة بين ظلم نفسى وظلم غيرى مضيعانى

الحيرة بين دموع عنيا واهات قلبى  قتلانى

اااه

اااه يا حزن يا مكتفنى فى الساقيه

عمال الف لا بشوف طريقى

ولا عارف فين رفيقى

ولا ايه ايامى اللى فاتت ولا فين ايامى اللى باقية

اااااه يا حزن يا مكتفنى فى الساقيه

ازاى تكتفنى هو انا بنى ادم حر ؟؟

ولا حيوان  مغصوب ؟

ولا انا مجنون ؟؟

ولا انا تعبان ؟؟

ولا انا حيران ؟؟

حد يرد ..

حد يقولى سبب للى حاسس بيه

احسن صدقونى

كل مابدور مع الساقيه وبتزق

حاسس انى .. من الخنقة هطق

سامح طاحون 

s.tahuon@live.com

مش عايز تفوق .... سامح طاحون

مش عايز تفوق 




بقالى سنين بنجرح ..

وكل مرة بنسحب بهدوء ...

 والاقى نفسى 

ببيع نفسى

 لنفس الشخص 

ومش عايز افوق ...

وكل مرة برجع اطالب بنفس الحقوق ...

 حقى فى قلبه

 حقى فى حبه

 حقى فى عشقه

وحقى فى شوية حنية 

 ويكون برضه الرد جرح

 وارجع تانى وانسحب فى هدوء ...

 ولساك ياقلبى 

مش عايز تفوق ؟؟؟

سامح طاحون
 s.tahuon@live.com

جريده اليوم السابع تنشر (( رمضان كريم )) للشاعر سامح طاحون

جريده اليوم السابع تنشر (( رمضان كريم )) للشاعر سامح طاحون

الله على أيامك ياسى رمضان
والناس اللى فى الشوارع رايقه
وفرحانه وبترحب بيك
وست الستات فى المطبخ
بتجهز لفطار أول يوم
وطبعا من فترة وهى بتجهز ليك
ومصر البهية
رجعت صبية
على الأقل فى عنينا
لكن فى الواقع لسه زى ماهى
لسه غضبانة علينا
ولسانا غضبانين عليها
وزى كل عام وربنا مايقطع عادة
لسه الخير برغم اللى حاصل
لسه الخير بسببنا ماليها
وأدام لسه فى ناس بتقدر تعيش برغم كل الإحباط اللى فيها
ولسه فى ناس بتقدر قبل الغلط تلحق نفسيها
وتقول اللهم إننا صايمين
ولسه الشيخ سيد بيفوت على البيوت ويقول اصحوا يا نايمين
والجد لساه بيحضر حلقة ذكر الشيخ ياسين
وكمان لسه الصحاب فى رحاب الحسين سهرانين
يبقى كل سنة وأنتم طيبين
ورمضان كريم 

s.tahuon@live.com

للاطلاع عليها من خلال صفحات اليوم السابع 

http://www.youm7.com/News.asp?NewsID=265698&SecID=190