عم محروس الفكهانى

عم محروس الفكهانى
طول اليوم ضحك وهزار 
تسمع صوت الدندنة تشجى مع صوت عصافير النهار
يقابلك وانت جايب عيش ياخد رغيف
ويقولك نكتة حلوة ماتعرفش يقصد يضحكك
 ولا محتاج يثبت ان دمه خفيف
وانت نازل على شغلك ويدوب بتركب عربيتك 
يقوم يقولك  هو الريس راح فين؟
ومحتاج اسئل سؤال هو اللى اسمهم فلول النظام  دول  يبقوا مين ؟
طيب وهو احنا فعلا ناوينا نحرر فلسطين ؟
وفى سؤال غريب يا دكتور ..
ماعرفش ليه  مش بيقولى غير يا دكتور  زى مايكون بيحب  يفكرنى انى فاشل !!
اقوله ايه ياعم محروس
يقولى فين الفلوس؟
ملايين ومليارات  ولسه الخلق على رقاب بعضيها بتدوس!
هو اللى جاى  هيكون حرامى كبير ولا صغير؟
وياترى حال البلد هيفضل كده ولا هيتغير؟
وياترى عمرو موسى ده معانا ولا مع الناس التانيين ؟
وياترى البرادعى ده شريف ولا  تابع للخاينين ؟
مابتردش ليه يا دكتور ؟
اقوله ياعم محروس
يقولى مالك ؟
تعبان ؟
تحب اجيبلك عرق سوس؟
ولا تحب اشوف لك حل للناموس ؟
اصله سايب فى وشك علامات
مش مهم هشوفلك حل
بس قولى لما صدام لساه عايش امال مين اللى مات ؟
وليه دلوقتى الشعب الغلبان بتاعنا عايش فى ثبات وسكات
ومابنسمع  غير عن فريقين
فريق بيدور على القياده  واللى يبقى رئيس واللى يعمل حزب
وفريق  تانى قايم على السرقة والبلطجة وعايز يولع فى البلد ويعلنها حرب
هو مفيش غير دول؟؟
طب واحنا فين يا دكتور؟
قولى صحيح هى الديمقراطية فعلا هتيجى بلدنا فى يوم من الايام ؟
اصل انا سمعت ان امريكا حبساها فى بيررر غويط 
زى  ماحبسوا  الغولة فى جزيرة الشيطان !
هى الديمقراطية يعنى حرية الانسان ؟
ولا هما من دلوقتى جهزوا تهمة يرموا بيها على الغلبان
وهى فلول النظام
زى النظام القديم كانت تهمته للغلبان
انه عميل وبالدليل
انت ساكت ليه يا دكتور انت كمان؟
هو انا بكلم نفسى
انت شكلك زعلت
 طب اتكل على الله يا دكتور 
صباحك فل
نهارنا نادى ان شاء الله
------------

سامح طاحون

s.tahuon@live.com

s.tahuon@yahoo.com