بصراحه .. سامح طاحون
مابقتش فاهمك بصراحه ..
مابقتش عارف بتكرهينى ولا بتحبينى
مابقتش عارف اروح لمين فى عز البرد واقوله ضمنى وخبينى
مابقتش عارف لو سافرت كام سنة
ياترى لما ارجع هلاقيكى فكرانى ولا نسيتينى
مابقتش عارف ايه اللى اتغير فينا
مابقتش عارف هترسى فين مركبك وفى اى مينا؟
مابقتش عارف طيرك مدبوح بجد ولا بيضحك علينا؟
مابقتش عارف مين اللى ظالم ومين مظلوم
وقمرك هيشق ليلك اكيد ولا هيفضل ليلك معتوم
ونيلك برغم الاهانة هيفضل معانا؟
ولا هيلم حاجته ويهرب قبل مانصحى من النوم ؟
ومن كتر الحاجات اللى مش عارفها
قررت اقولك زى مابقولك كل يوم
انا زعلان منك بصراحه ..
ماهو انا اصلى جبان
فلازم اللوم يكون عليكى
اصلى ماقدرش اعترف مثلا انى سايبهم يجرحوكى
وماقدرش مثلا اضرب واحد شغلته طول اليوم يسب فيكى وف ابوكى
وماقدرش مثلا اخلص الحكاية وانتقم من اللى نهبوكى
وماقدرش مثلا اولع فى اللى اطلقوا على نفسهم ثورجية
واللى بيتأسفوا للحرامى ولشلة الحرامية
واللى بيدوروا على شئ يسرقوه باسم الثورة
والباقى بييجروا على اكل عيشهم ونسيوكى
يعنى بكل عزم وقوة اعترف وبصوت عالى
كل اللى بيقولك انه بيحميكى ده فى الاصل حرامى
شوفى دفاترك اللى سجلتيها وخبيتيها بعيد عن عنيهم
تلاقى اللى تاجر بالامنا واللى تاجر بأحلامنا واللى تاجر حتى بشرفنا
وانتى برضه مارضيتيش تفضحيهم
طيب انا دلوقتى اعتب عليكى ولا اعتب عليهم ؟
شوفتى ادينى برضه عايز اعتب عليكى
مش قولتلك جبان !
عارفه ...
لسه ياما كتير هيبان
ولسه بسبب الجبن والتشتت بين مين اللى باع ومين اللى خان
هنسكت ونسكت لحد مايضيع الامان
والامان يابلد مش فى ملك ولا رئيس
الامان هو احنا واى حاجه غيرنا تبقى تهجيص
واحنا ولادك مهما يقولوا عنا برضه احنا ولادك
احنا امانك واحنا برضه البلطجية والحرامية والجبان اللى سابك
احنا ... واحد عبيط اسمه العقيد هربان بعيد وبيقبض على كل كلمة وبرضه بنقول بطل
احنا .... بطل الحرب والسلام وبطل الافلام وصاحب الضربة الجوية واللولبية والمهلبية والفول والطعمية
احنا ..... الثورة الشريفة واحنا فلول النظام واحنا الشهدا واحنا الخونة واحنا بياعين الكلام ..
احنا ... الجيش والشعب والاسعاف وعم صلاح بتاع الكبدة اللى عند المفارق
احنا ... الشحاتين اللى موجودين فى الشوارع علشان مش لاقيين ..
احنا ... بنات الليل و الحشاشين والخمورجية اللى فى البارات متلقحين
احنا .... المعتصميــــــــــن !!
احنا .... اللى يوم 8 نازليــــن !!
احنا ..... اللى هربنا من السجون ولسانا لحد دلوقتى مستخبيين ..
احنا .... اللى مرميين فى المستشفيات الحكومية وحتى حق العلاج مش لاقيين
احنا ... الاطفال اليتامى واطفال الشوارع والاطفال المعاقين ..
احنا ... الاخوان والسلفيين والمسيحيين ..
احنا ... اللى قولنا لا وبرضه احنا اللى قولنا نعم
احنا ... اصحاب الفضائيات
احنا .... اصحاب الجرايد والمجلات
احنا ... اللى بنرغى طول اليوم فى كل الاذاعات
هل بعد اللى عددتهولك ده كله نقدر نحدد
مين اللى بجد مصريين ومين الخونة اللى فى وسطينا مستخبيين ؟
ومين الشجاع اللى يتكلم ويقول بصراحه العيب فى مين ؟
واعتراف كمان من غلبى
انا اللى قتلت سليمان الحلبى ..
استنينى راجعلك بعد الاستراحه
وهعترفلك بكل حاجه بصراحه
سامح طاحون
______________________
لا امانع النشر ولكن ارجوا ذكر المصدر والنشر بنفس الصيغة ...
