نحن الان فى اواخر 2010 والكل يشجب ويندد والكل ينادى بالتغيير وهناك جماعات واحزاب بس اللى خدته القرعه تاخده ام الشعور
فى قديم الزمان ايام السندباد البحرى والمعلم بخ كان لمصر علم واحد كنا فى قمة الجهل وانا وطنى و وطنطن كان فى لسه شوية غباء يطلق عليها وطنية وانتماء ولكن الان ومع اللى بيحصل اصبح لنا 200 علم و 14 لوجو و 3 كيلو طماطم وابو الليف
بقى فى احزاب وخراب ودعاه وهواه و130 دار افتاء للعاطلين
بقى فى عمرو خالد وعمرو دياب و بلاش نضم عمرو موسى ومن عصر نجيب محفوظ انتقلنا الى عصر نجيب سويرس
فى 2010 اصبح الاحتفال ب 6 ابريل اهم من الاحتفال ب 6 اكتوبر بس عادى الفرق والاختلاف مش كبير قوى يعنى فى 6 اكتوبر عبرنا وفى 6 ابريل رقصنا
اكتوبر كان فعل كان كفاح اما 6 ابريل كان كلام وصياح ولاننا شعب بيستسهل لاقينا الكلام ببلاش ادام لسه مفيش عليه رسوم ولا دمغات فعادى بقى اما لو كنا فى 6 ابريل هنحارب ماكنش حد شارك فى 6 ابريل ولا حتى اتفرج على اعلانات البرسيل
ولان مؤسسى 6 ابريل يعرفون الشعب جيدا اول ما طلبوا طالبوا بشيئين اما ان تلزم بيتك او تنزل تقف فى الشارع فالناس قالت ان كان على كده ماشى
بعدها بحبه او بتلات حبات جالنا سيدنا البرادعى ومدد "يا باتعه " المهم شغلونا البرادعى راح البرادعى جه ده بيقول ده بيعيد ده سافر ده رجع ده راح يلعب فى المراجيح المهم قالك مش هترشح ....ليه ياعم الحج ده انا بحبك وبحترمك من قبل ماتيجى تقول غير هدومك وغير حياتك واغسل رجليك بحبك علشان كنت لينا رمز للبلد بحبك علشان بفتخر بيك وبقول ده مصرى ولو سألتك انت مصرى قول بنهاوى المهم قالوا واكدوا ان البرادعى اجنده طلعوا اخواتنا المؤيدين قالوا لالالالالالالا البرادعى مش اجنده البرادعى كشكول نيهاهاهاها( ضحكة شريرة ) قالوا ايه ان البرادعى مش اجنده بس هو مش هيترشح علشان لو اترشح يبقى بيدى الجماعه شرعيه لتزوير الانتخابات طيب هو من الاول ماكنش عارف ان فى تزوير وحجات ومحتجات ؟؟ ولا كان فاكر انه جاى يرشح نفسه قصاد سيدنا المغاورى ؟؟
رد واحد تانى ظريف كده وذكى وحليوه قالى لا هو مش هيترشح علشان الشعب مش واقف معاه مفيش غير 200 الف او 300 بس وطبعا ده مش رقم بالنسبة لشعب 88 مليون
طيب اولا انا ماشوفتش ال 300 الف دول اكبر مظاهره ليكم كانت 10 الاف مع اللغبطة والزحام وفى الزحام محدش بيعرف ده ايه ولا بكام ومحدش يقولى توقيعات التوقيعات دى ولا ليها لازمه اصلا الا لو هنقدر نجمع 46 مليون توقيع على الاقل وف الاخر هنرميهم فى النيل ونشرب بقى براحتنا ونبرطع
المهم رد واحد ابن ناس قال لو البرادعى مش اجنده وعايز يكذب الاخبار دى يكمل فى نفس الطريق مهما كان التمن اللى هيدفعه
وطبعا لا البرادعى هيكمل ولا اولاد حسن هيعدلوا حال الزمالك
المهم ياعم الحج شويتين كده وفضلت قناه اسرائيليه تذيع فى شرح للاخ عمرو خالد بيتكلم فيه عن هيكل سليمان وبيقول انه موجود تحت المسجد الاقصى وان فى الاساس المسجد الاقصى اتبنى مكان بيت رجل يهودى والمهم فضل طول الدرس بيبرر لاسرائيل ما تفعله وف الاخر يقول الاقصى بتاعنا ومش هنسيبه طب نفهم ايه ياعم حيرتنا
وانهارده بقى الحج عمرو خالد بعد رجوعه من الحج راح اسكندرية قال ايه رايح يساند المحجوب وقال ايه رايح يساند الحزب الوطنى مش الحزب هو اللى خرجك وطردك من مصر؟ مش الحزب اللى قولت عليه انه سرق مشروعك الخيرى ؟ طب انت غاوى تحيرنا .... برضه محدش فاهم حاجه
وشوية وشوية حال البلد بيتغير والناس اللى كنا واخدينهم رمز وقدوه وشمعه ادامنا حالهم بيتغير وباقى الناس مكتومين
طب ايه العمل وايه اللى بيحصل ده ..هو النظام شربكم شاى بالياسمين ؟؟؟ بتاع عادل امام ؟ ولا صوركم وهددكم فى اوضاع مش ولا بد برضه زى عادل امام فى فيلمه الشهير السفاره فى العماره ؟؟ ولا ايه ؟
حد فاهم حاجه ؟؟
وبالنسبة للشباب المنضمين ل 6 ابريل مع احترامى ليكم فيكم اخواتى واصحابى بس اسف مش هتقدروا تعملوا حاجه ونفسى تكسفونى وتطلعونى عيل وتقدروا تعملوا حاجه انتم لحد الان مفيش غير وقفات ودى بيكون عدد المشاركين فيها قليل وده بيرجع لعدم ثقه الناس ولعدم اقتناع الناس بيكم احنا 88 مليوووووووون ماتجبوش 15 واحد بيغنولكم وتقولوا الشعب معانا
وغير الوقفات ليكم نشاطات على الفيس بوك وده الحكومه سايباه بمزاجها عند الجد هتعمل زى سوريا وتعمل للدومين حظر وطبعا نظام بيقتل كل يوم فينا مش هيقف على حظر موقع مهما كان
هاااا حد فاهم حاجه فى البلد دى؟؟
اللى فاهم يدينى عقله افهم بيه ويمشى هو حافى
برغم كل ده بس لسه قادر احلم ولسه شايف امل ومتفائل مهما يحصل
بس الاول نفهم بس
سامح طاحون
