انت يا عــم ........... سامح طاحون

انت ياعم .....


ممكن تسمعنى

فى حجات كتير بتوجعنى

ومحتاج واحد يكون عنده دم

افضفض معاه ...

واحد يكون داق وعرف معنى الهم

وفاهم كويس الحياه

خصوصا لما فجأه بتتقلب

من راحه وفرح لحزن و غم

ماهو المفروض الناس لبعضيها..

ولا دى كمان كدبه زى اللى قبليها

واللى قبليها حجات

استفتاء وانتخابات

وصوتك امانه

والاسلام  هو الحل

وتتبدر الارض حوارات ومابتطرح غير الذل

انت ياعم ...

عمرك احتارت بجد ؟

عمرك حسيت انك غريب فى وسط اهلك ومش عارف حد؟

عمرك حسيت ان انت مش عارف تختار

ولا عارف تفرق بين الصح والغلط

وتلاقى الحاجه اللى بتحلم بيها ومشيت فى طريقها

يدوب على ماتقرب توصل تلاقى الطريق بيمتد

وباصرار تكمل وتكمل وفى النهاية تلاقى ان طريقك سد ...

تصدق ياعم ..

انا حاسس ان انا حمار

ماتستغربش

حقيقى انا حمار ...

ويمكن علشان كده مش عارف اختار

ويمكن علشان كده بدور على حد يسمعنى

وطبعا المفروض فى اسباب تمنعنى

تمنعنى من انى احكى ومن انى اقول

خصوصا ان الناس شغلتها التريقة على طول

عارف حيلتى شوية حجات

بفكر ابيعهم واشترى وطن صغير

وطن كده تقول كام قيراط

وطن لما اتعب الاقيه جاى جرى بيضمنى ويسمعنى

وطن يكون دوا لكل جرح بيوجعنى

وطن مافيهوش ذل

وازرع فيه شجرة فرح

طول السنة طرح

وبيتفرق على الكل

وطن لما احب اتمشى فيه

اتعالج نفسيا

مش كل ماتمشى يصيبنى شلل من المأسى اللى فى الشوارع

وهم الناس اللى من شبابيك بيوتهم بتطل

انت ياعم ...


سامعنى؟

ولا انت كمان بقيت زى الكل ؟

سامح طاحون

_______________________
لا امانع النشر ولكن مع ذكر المصدر ونشرها باسم الشاعر سامح طاحون
s.tahuon@live.com
s.tahuon@yahoo.com