من اجل مصـــر

مرحبا بكم فى عالمكم الافتراضى ...

اللى بيطلع بيكم لفوق وبينزل بيكم ع الفاضى

مرحبا بكم فى عالم الاوهام ..

كل واحد فيه عملناه مناضل وزعيم

يدخل يكتب كلمتين ويقفل جهازه وينام

وانا وانت وهو  نسمع الكلام

ونخرج فى مظاهره  تلاقى العدد 100 او حتى الف

وبنبقى فرحانيييين  !!!

ونقول الناس بتفوق

والنبى يا خويا انت وهو  اطرحولى ال 100 ولا  الالف من 82 مليون

وشوف الناتج كام ؟؟؟

................................................

علشان محدش يتكلم ويقولى انت مش عارف ايه وليه وفين ومنين وبتصغرنا وبتكبرنا وبتطلعنا وبتنزلنا والخ الخ

عايزين نتكلم بالعقل

لما  نعمل مهرجان ونفضح ونشجب وندين ونعمل ومانعملش ومش عارف ايه  ده حلو قوى  بس  مش معنى كده  اننا  عملنا  اللى علينا

شوف كده اى مظاهره  شوف العدد كام 

طبعا واحد ظريف لطيف  هيرد عليا ويقولى  الناس كل  يوم بتعرف  وكل  يوم  عددنا  بيزيد  !

طيب  لما  نكون الف  وبعد شهر ولا اتنين  عملنا  مظاهره  بقينا  الفين   بقينا  5000 او حتى بقينا  10000

طيب  هما  ال 10000 دول  هما  بس اللى عايشين فى البلد ؟؟

لما هنستنى  ان كل شهر ولا اتنين  نزيد  100 ولا 200 ولا حتى الف  يبقى على كده  عايزين سنييييييييييييييين  علشان  الناس كلها تفوق  وطبعا هتفوق  بعد ماتكون خربت 

طبعا نفس الشخص الظريف اللطيف  هيرد ويقولى  انت  واد تييييييت  وحجات ومحتجات  ويائس من حياتك

لكن احنا واحنا واحنا 

طيب يا انتوا   لما انتوا  خايفين ع البلد  بجد  ليه ما بتعملوش حملة توعيه يشارك  فيها  كل الناس  بدون ماترفعوا  رايات يعنى  ولا حد يقولى عاااااااا انا  غداوى  ولا حد يقولى عاااااااااا انا  ابريلى  ولا عاااااااااا انا  وفدى ولا عاااااااا انا ناصرى  وتطلعولى بحركات بقى كفاية وحكاية ورواية ونغنى ونهلل

ليه مانبدئش نوعى بعض بجد من اجل  بلدنا  ليه  ما بنبدئش  نوعى اهالينا  واصحابنا  وجيرانا  ؟؟

ليه  مانتعاهدش قبل كل مظاهره  ان كل واحد فينا  المرة دى  هيقنع  على الاقل 10 افراد من عائلته واصدقائه  انهم ينزلوا  معانا 

ليه مابنعملش فى صمت  بدون مانرفع رايات  ولو  رفعنا  رايه  تبقى رايه واحده بدون الوان ولا شخاليل  رايه واحده  مكتوب  علينا (( نتظاهر من اجل مصر ))  من اجل حقوقنا اللى ضايعه ومن اجل كل شئ  فى البلد دى اتسرق واتحرق

ليه مانفهمش الناس  انهم  لو شاركوا معانا  وحتى اتشردوا  وجاعوا  فده  هيكون جوع مؤقت  وبعده الشبع  احسن من خوفهم اللى مسيطر عليهم ويفضلوا  جعانين على طول  ؟

انتوا  فاكرين  لما  بتوقعوا  على بيان التغيير على الانترنت  ده هيعمل  شئ ؟؟

ولا حتى اللى على الورق  ؟؟ والله عند الجد  هيقولوا  توقيعات مزوره  ويحبسوا  اللى مسؤل عنها 

الحل  انكم  تنسوا  بقى  حكاية السلاطين والزفة الكدابة  مش كل حاجه كلام كلام وغنى وزفة للى رايح وسلام للى جاى وسلام على طول سلام  على طول  وانا وانت والعروسه ورقصنى 

ليه  مابنعملش فى سكوووووت  بس نعمل  بجد  نخاف على بعض  وننفذ  مش مهم  رايه  مين  اللى هتترفع فى النهايه  المهم  ان  رايه مصر تفضل مرفوعه

زهقت واتخنقت 

ابقى اكمل  بقى  بعدين 

ان شاء الله 

سامح طاحون  
s.tahuon@live.com